02/03/2018
سندھ ایگریکلچر یونیورسٹی کے دورے کے موقع پر اصغریہ اسٹوڈنٹس آرگنائزیشن کے مرکزی صدر نے کہا کہ بیدار ملت جعفریہ نے ہمیشہ مظلومین کی حمایت اور ظالم کے خلاف ہر پلیٹ فارم پر آواز بلند کی ہے، یہی وجہ ہے کہ ملت جعفریہ دنیا میں ظالموں کے خلاف قیام کرنے کے استعارہ کی حیثیت رکھتی ہے۔
اصغریہ اسٹوڈنٹس آرگنائزیشن پاکستان کے مرکزی صدر قمر عباس غدیری نے کہا ہے کہ ایران کے اسلامی انقلاب کے بعد سے لیکر تاحال ملت جعفریہ امام خمینیؒ کے نقش قدم پر چلتے ہوئے عالمی استعمار کے خلاف برسر پیکار ہے، ان خیالات کا اظہار انہوں نے اے ایس او کے مرکزی "راہیان کربلا و عاشقان مہدیؑ" کنونشن کے سلسلے میں سندھ ایگریکلچر یونیورسٹی میں مرکزی دورہ کرتے ہوئے کیا، اس موقع پر کثیر تعداد میں کارکنان اور طلباء موجود تھے۔ قمر عباس غدیری نے مزید کہا کہ جہاں کہیں مسلمان ریاستوں میں استعمار اور سفلی قوتیں سازشیں کر رہی ہیں، بیدار ملت جعفریہ نے ہمیشہ مظلومین کی حمایت اور ظالم کے خلاف ہر پلیٹ فارم پر آواز بلند کی ہے، یہی وجہ ہے کہ ملت جعفریہ دنیا میں ظالموں کے خلاف قیام کرنے کے استعارہ کی حیثیت رکھتی ہے۔ مرکزی کنونشن کے حوالے سے گفتگو کرتے ہوئے انہوں نے کہا کہ یہ مزکری کنونشن تنظیم کی افادیت اور تربیت کا سرچشمہ ہوتا ہے، کثیر تعداد میں طلباء کا شرکت کرنا اور نظم و ضبط کا مظہر نظر آتا ہے۔ واضح رہے کہ اصغریہ اسٹوڈنٹس کا 47 واں سالانہ مرکزی کنونشن بعنوان راہیان کربلا و عاشقان مہدیؑ 15 تا 19 فروری اندرون سندھ کے علاقے بھٹ شاہ میں منعقد کیا جا رہا ہے۔